Irabazi edo etxera

Europa Leagueko finaleko porrota eta horrek ekarri zituen negarrak ez ditu Athleticen zaleen ilusioak murriztu. Denboraldi hau izugarria izan da eta familia zurigorri guztia berriz amesten hasi da, titulu bat berriz irabaztea inoiz baino hurbilago dago. Honen erantzulea noski Marcelo Bielsa da, nahiz eta hasieran zalantza asko sortu azkenean Athletic "bere Athletic" bihurtu du. Horregatik, baita pertsona moduan erakutsi dituen balioak pertsona oso maitatua bihurtu dute bilbotarren artean. Baina Bilbon temati dira, Bielsak urte amaieran bukatzen du bere kontratua eta bere berritzeaz ez da ezer esaten. Zein izango da Bielsaren etorkizuna?

Entrenatzaile baten berritzea lau iritzitan oinarritzen da batez ere: Zuzendaritzarena, entrenatzaile berarena, jokalariena eta zaleena. Azken hauen jarrera argia da, denboraldian zehar “Athletic Karajo”, “A lo loco se vive mejor” eta antzekoak ohikoak izan dira San Mamesen eta azken partiduan argi erakutsi zuten zer pentsatzen zuten zelai osoak Bielsari geratzea eskatu zioenean.

Jokalariek ere garrantzia handia daukate entrenatzaile baten jarraitutasunean, bestela gogoratu besterik ez dugu urte honetan Gregorio Manzanori Athleticon eta Villas-Boasi Chelsean gertatutakoa. Jokalariak ez zeuden ados entrenatzailearen metodologiarekin eta nahiz eta ofizialki onartua ez izan uste handiak daude jokalariek ez zutela guztia eman beraien entrenatzailea defendatzeko eta horregatik bi hauek taldetik irten behar izan ziren. Athleticen ez da hori gertatzen, jokalariak hertsiki betetzen dituzte Bielsaren arauak, nahiz eta askotan arraroak edo oso aspergarriak izan, adibidez, jokalariek aipatutako ehunka bideo famatuak. Hala ere, zurigorriek behin eta berriro errepikatu dute oso gustura daudela Bielsarekin eta berari esker talde irabazle bat bihurtu direla.

Baina azken hitz beti zuzendaritzak dauka. Josu Urrutiak argi erakutsi du Bielsarekin jarraitu nahi duela: “Gure testuinguru bakarra Bielsa da, ez dago B planik”. Gainera Amorrortuk, Athleticen kirol zuzendariak, adierazi du Bielsaren jarraitutasuna “funtsezkoa” dela.

Beraz lehen aipatutako klabeetatik lautik hiru betetzen dira, baina zer gertatzen da Marcelo Bielsaren nahiekin? Galdera hau erantzutea oso zaila da, Bielsak beti adierazi du bere kontratua urtez urte berritzen duela eta horregatik pista gutxi daude bere ideiei buruz. Gainera Europa Leagueko finala jokatu baino lehen hitz enigmatiko batzuk bota zituen: “Denboraldia bukatzerakoan ikusiko dugu. Orduan  lortutako helburuak aztertuko ditugu”. Beraz Athleticek izandako porrota eta ligako emaitzak erabakigarriak izan ahal dira. Horrez gain zurigorriek kezkatzeko beste arrazoi bat daukate, Bielsa ez da inoiz geratu gehiegi taldeetan, gehienez bi urte, nahiz eta garaipenak lortu.

Konklusio moduan esan daiteke Bielsaren etorkizuna kopa finalaren menpe dagoela. Galtzen badu seguru aski taldetik joango da. Garaipena lortzen badu, ordea,  geratzeko aukera handiak dauzka, gainera azken egunetan adierazi du oso pozik dagoela Bilbon eta eskertu egin ditu afizioaren hitz onak. Hori bai, geratzen bada ez da izango denbora askorako, lehen esan denez Bielsa, bi urte pasatzen direnean, beste helburu batzuen bila joaten da.